ದಿನಾಂಕ್ 23 ಮಾರ್ಚ್ 2025 ವೆರ್ ಆಮ್ಚ್ಯಾ ಅಸೋಸಿಯೇಶನಾಚ್ಯಾ ಸಾಂಗಾತ್ಪಣಾನ್, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ, ಕನ್ನಡ ಆನಿ ಸಂಸ್ಕೃತಿ ಇಲಾಖೊ ಹಾಣೆಂ ಕೊಂಕಣ್ ಭವನಾಂತ್ ಮಾಂಡುನ್ ಹಾಡ್‌ಲ್ಲೆಂ ಕಾರ್ಯಕ್ರಮ್ ಗೌರವ್ ಪ್ರಶಸ್ತಿ 2024 ಆನಿ ಪುಸ್ತಕ್ ಪುರಸ್ಕಾರ್ 2024. ಸಾಂಜೆರ್ 4:00 ವರಾಂಚೆರ್ ಕೊಂಕಣಿಂತ್ ಪವಿತ್ರ್ ಮಿಸಾ ಬಲಿದಾನ್ ಆಸಾ ಕೆಲ್ಲೆಂ. ಮಿಸಾ ನಂತರ್ ಕಾಫಿ-ಫಳಾರ್ ಜಾವ್ನ್ ಜುಸ್ತ್ 5:30 ವರಾಂಚೆರ್ ವೇದಿಚೆರ್ ದಿವೊ ಪೆಟೊವ್ಚ್ಯಾ ಸವೆಂ ಸಾಂಸ್ಕೃತಿಕ್ ಕಾರ್ಯಕ್ರಮಾಂ ಆರಂಭ್ ಜಾಲಿಂ. ಅಕಾಡೆಮಿಚೊ ಅಧ್ಯಕ್ಷ್ ಶ್ರೀಮಾನ್ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ಹಾಣೆಂ ಹಾಜರ್ ಆಸ್‌ಲ್ಲ್ಯಾ ಸರ್ವಾಂಕ್ ಮೊಗಾಳ್ ಉತ್ರಾಂನಿ ಮಾಯ-ಮೊಗಾಚೊ ಯೆವ್ಕಾರ್ ಮಾಗ್ಲೊ. ಗೌರವ್ ಪ್ರಶಸ್ತಿ ಜೊಡ್‌ಲ್ಲ್ಯಾ ಶ್ರೀಮಾನ್ ಪ್ಯಾಟ್ರಿಕ್ ಕಾಮಿಲ್ ಮೊರಾಸ್, ಶ್ರೀಮಾನ್ ಜೋಯಲ್ ಪಿರೇರಾ, ಶ್ರೀಮತಿ ಸುಬಿನಾ ಮೊತೇಶ್ ಕಾಂಬ್ರೇಕರ್, ಆನಿ ತಶೆಂಚ್ ಪುಸ್ತಕ್ ಪುರಸ್ಕಾರ್ ಜೊಡ್‌ಲ್ಲ್ಯಾ ಶ್ರೀಮತಿ ಫೆಲ್ಸಿ ಲೋಬೊ ಆನಿ ಶ್ರೀಮಾನ್ ವಲೇರಿಯನ್ ಸಿಕ್ವೇರಾ ಹಾಂಕಾಂ, ಮೈಸೂರ್ ಚಾಮರಾಜ ಕ್ಷೇತ್ರಾಚೊ ಎಮ್.ಎಲ್.ಎ. ಜಾವ್ನಾಸ್ಚ್ಯಾ ಶ್ರೀಮಾನ್ ಕೆ.ಹರೀಶ್ ಗೌಡ ಹಾಣೆಂ ಪ್ರಶಸ್ತಿ - ಪುರಸ್ಕಾರ್ ಪ್ರಧಾನ್ ಕರುನ್ ಸನ್ಮಾನಿತ್ ಕೆಲೆಂ.
ಮಾನಾಚೆ ಸಯ್ರೆ ಜಾವ್ನ್ ಕನ್ನಡ ಆನಿ ಸಂಸ್ಕೃತಿ ಇಲಾಖೆ, ಮೈಸೂರು ಡಿವಿಜನ್ ಹಾಚೊ ಜಾಯಿಂಟ್ ಡೈರೆಕ್ಟರ್ ಜಾವ್ನಾಸ್ಚ್ಯಾ ಶ್ರೀಮಾನ್ ವಿ.ಎನ್. ಮಲ್ಲಿಕಾರ್ಜುನ ಸ್ವಾಮಿ ಹಾಣೆಂ ಕಾರ್ಯಕ್ರಮಾಂತ್ ಭಾಗ್ ಘೆತ್‌ಲ್ಲೆಂ ಆನಿ ಮಾಯ್ ಭಾಷೆಚಿ ಸೇವಾ ದೀವ್ನ್ ಆಸ್ಚ್ಯಾ ಸರ್ವಾಂಚೊ ಉಪ್ಕಾರ್ ಬಾವುನ್ ಏಕ್ ಪುಸ್ತಕಾಚೆಂ ಉಗ್ತಾವಣ್ ಕೆಲೆಂ. ವೇದಿಚೆರ್ ಇತರ ಪ್ರಮುಖ್ ವ್ಯಕ್ತಿ ಜಾವ್ನ್ ಶ್ರೀಮಾನ್ ವಲ್ಲಿ ವಗ್ಗ, ಅಧ್ಯಕ್ಷ್ ಜೋನ್ ವಿಲಿಯಂ ಡಿಸೋಜ, ಕಾರ್ಯದರ್ಶಿ ಶ್ರೀಮತಿ ಜೋಯ್ಸ್ ಸಿಕ್ವೇರಾ ಹಾಜರ್ ಆಸ್‌ಲ್ಲಿಂ.
ಸಾಂಸ್ಕೃತಿಕ್ ಕಾರ್ಯಕ್ರಮಾಂ ಜಾವ್ನ್ ಆಂಟೊನಿ ಕೀರ್ತನ್ ಜೇಮ್ಸ್ ಹಾಂಚೆಂ ಬ್ರಾಸ್ ಬ್ಯಾಂಡ್ ಆನಿ ತಶೆಂಚ್ ಎಲ್ರೊನ್ ರೊಡ್ರಿಗಸ್ ಪಂಗಡಾಂನಿ ಸುಮಧುರ್ ಕೊಂಕಣಿ ಸಂಗೀತ್ ದೀವ್ನ್ ಲೊಕಾಕ್ ದಾದೊಶಿ ಕೆಲೆಂ. ಆಖೇರಿಕ್ ಜೆವ್ಣಾ ಸವೆಂ ಹೆಂ ಕಾರ್ಯಕ್ರಮ್ ಸಮಾಪ್ತ್ ಜಾಲೆಂ.
