ಮೈಸೂರ್‌ಚ್ಯಾ ಕೊಂಕಣಿ ಕ್ರಿಶ್ಚಿಯನ್ ಅಸೋಸಿಯೇಶನಾನ್ (ಕೆ.ಸಿ.ಎ.) ಆಯ್ತಾರಾ, ದಸೆಂಬರ್ 21 ತಾರಿಕೆರ್, ಮೈಸೂರ್‌ಚ್ಯಾ ವಿಜಯನಗರ 2ನೇ ಹಂತಾಂತ್ ಆಸ್ಚ್ಯಾ ತಾಂಚ್ಯಾ ಪ್ರಖ್ಯಾತ್ ಕೊಂಕಣ್ ಭವನಾಂತ್ ನಾತಾಳ್ ಫೆಸ್ತ್ ಆಚರ್ಸಿಲೆಂ.
ಕಪುಚಿನ್ ಯಾಜಕ್ ಬಾಪ್ ಸಾಂತಾ ಲೋಪಿಸ್ ಹಾಂಚ್ಯಾ ಮುಖೇಲ್ಪಣಾರ್ ಆನಿ ಹೆರ್ 9 ಯಾಜಕಾಂಚ್ಯಾ ಸಹ-ಭೆಟವ್ಣೆನ್ ಕೊಂಕಣಿಂತ್ ಪವಿತ್ರ್ ಮಿಸಾಚೆ ಬಲಿದಾನ್ ಭೆಟೊವ್ನ್ ಕಾರ್ಯಕ್ರಮ್ ಸುರು ಜಾಲೆಂ, ತ್ಯಾ ನಂತರ್ ನಾತಾಳ್ ಆಚರಣ್ ಚಲ್ಲೆಂ.
ಆಚರಣಾಕ್ ಚಡಿತ್ ಮೆರಗ್ ಹಾಡುನ್, ರಂಗಾ ರಾವ್ ಮೆಮೋರಿಯಲ್ ಚಾರಿಟೇಬಲ್ ಟ್ರಸ್ಟಾಚ್ಯಾ ವಿಶೇಷ್ ಚೇತನಾಚ್ಯಾ (specially-abled) ಭುರ್ಗ್ಯಾಂನಿ ನಾತಾಳಾಂಚೊ ಕೇಕ್ ಕಾತರ್ಲೊ. ಹ್ಯಾ ಸಂದರ್ಭಾರ್ ಹಿಂಕಲ್ ಪವಿತ್ರ್ ಕುಟ್ಮಾಚೆ ಇಗರ್ಜೆಚೆ ವಿಗಾರ್ ಬಾಪ್ ಸಂತೋಷ್ ಜಾನ್, ಕೆ.ಸಿ.ಎ. ಅಧ್ಯಕ್ಷ್ ಶ್ರೀಮಾನ್ ಜೋನ್ ವಿಲಿಯಂ ಡಿಸೋಜ, ತಶೆಂಚ್ ಕೆ.ಸಿ.ಎ. ಆಡಳಿತ್ ಮಂಡಳಿಚೆ ಸಾಂದೆ ವೇದಿಚೆರ್ ಹಾಜರ್ ಆಸ್‌ಲ್ಲೆ.
ಹ್ಯಾ ಸಂದರ್ಭಿಂ, ಬಾಪ್ ಸಂತೋಷ್ ಜಾನ್ ಹಾಣೆಂ ಮೈಸೂರ್‌ಚ್ಯಾ ಕೊಂಕಣ್ ಪತ್ತಿನ ಸಹಕಾರ ಸಂಘ ನಿಯಮಿತ ಹಾಚೆಂ 2026-ವ್ಯಾ ವರ್ಸಾಚೆಂ ಕ್ಯಾಲೆಂಡರ್ ಉಗ್ತಾವಣ್ ಕೆಲೆಂ. ಕಾರ್ಯಕ್ರಮಾ ವೆಳಾರ್, ಅಸೋಸಿಯೇಶನಾನ್ ಒ.ಡಿ.ಪಿ.-ಚ್ಯಾ (ODP) ಕ್ಯಾನ್ಸರ್ ರೋಗಿಂಚ್ಯಾ ಪ್ರೊಜೆಕ್ಟಾಚೆ ನಿರ್ದೇಶಕ್ ಬಾಪ್ ಟುನ್ನಿ ಕೊರಿಯನ್ ಹಾಂಕಾಂ ರುಪಯ್ 50,000/- ಚೊ ಚೆಕ್ ಆರ್ಥಿಕ್ ಮದತ್ ಜಾವ್ನ್ ಹಸ್ತಾಂತರ್ ಕೆಲೊ. ವಿಶೇಷ್ ಚೇತನಾಚ್ಯಾ ಭುರ್ಗ್ಯಾಂನಿ ಆಕರ್ಷಕ್ ಆನಿ ಅರ್ಥ್‌ಪೂರ್ಣ್ ಪ್ರದರ್ಶನ್ ದಿಲ್ಲೆಂ. ಅಸೋಸಿಯೇಶನಾನ್ ತ್ಯಾ ಸರ್ವ್ ಭುರ್ಗ್ಯಾಂಕ್ ಪುಲ್-ಓವರ್ (ಸ್ವೆಟರ್) ಕಾಣಿಕ್ ಜಾವ್ನ್ ದಿಲೆ. ಬೋಗಾಡಿಚ್ಯಾ ಸಾಂ. ಪೆದ್ರು ಇಗರ್ಜೆಚ್ಯಾ ಗಾಯನ್ ಮಂಡಳಿನ್ ತಾಂಚ್ಯಾ ಸುಮಧುರ್ ನಾತಾಳಾಂಚ್ಯಾ ಗಿತಾಂ (carols) ಮುಖಾಂತ್ರ್ ಲೊಕಾಕ್ ದಾದೊಶಿ ಕೆಲೆಂ. ಸ್ಪಾಟ್ ಗೇಮ್ಸ್ ಕಾರ್ಯಕ್ರಮಾಕ್ ಚಡಿತ್ ಉರ್ಬಾ ಹಾಡ್ಲಿ ಆನಿ ಲೊಕಾಕ್ ಖುಶೆನ್ ಭರ್‌ಲ್ಲೆಂ.
ಹಿಂಕಲ್ ಪವಿತ್ರ್ ಕುಟ್ಮಾಚೆ ಇಗರ್ಜೆಚೆ ವಿಗಾರ್ ಬಾಪ್ ಸಂತೋಷ್ ಜಾನ್ ಹಾಣೆಂ ನಾತಾಳಾಂಚೊ ಸಂದೇಶ್ ದಿಲೊ. ಕೆ.ಸಿ.ಎ. ಪ್ರಧಾನ್ ಕಾರ್ಯದರ್ಶಿ ಶ್ರೀಮತಿ ಜೋಯ್ಸ್ ಸಿಕ್ವೇರಾನ್ ಜಮ್‌ಲ್ಲ್ಯಾ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ. ಉಪಾಧ್ಯಕ್ಷಿಣ್ ಶ್ರೀಮತಿ ಮೀನಾ ಡಯಾಸ್ ಹಾಣೆಂ ವಂದನಾರ್ಪಣ್ ಕೆಲೆಂ. ಶ್ರೀಮಾನ್ ವಿನ್ಸೆಂಟ್ ಡಿಸೋಜಾನ್ ಕಾರ್ಯಕ್ರಮ್ ಚಲವ್ನ್ ವೆಲೆಂ. ಉಪಾಧ್ಯಕ್ಷ್ ಶ್ರೀಮಾನ್ ಸ್ಟ್ಯಾನಿ ಲೋಬೊ, ಖಜಾನ್ದಾರ್ ಶ್ರೀಮಾನ್ ಅನಿಲ್ ಸಲ್ಡಾನ್ಹಾ, ಸಹ-ಕಾರ್ಯದರ್ಶಿ ಜಾವ್ನಾಸ್ಚೆ ಶ್ರೀಮಾನ್ ಸಿಲ್ವೆಸ್ಟರ್ ಡಿಮೆಲ್ಲೊ ಆನಿ ಶ್ರೀಮತಿ ಪ್ರಮೀಳಾ ಮೊನಿಸ್ ಹಾಣೆಂ ಹ್ಯಾ ಆಚರಣಾಂತ್ ಭಾಗ್ ಘೆತ್ಲೊ. ಮೈಸೂರ್ ಆನಿ ಚಾಮರಾಜನಗರ ಜಿಲ್ಲೆಚ್ಯಾ ಕೊಂಕಣಿ ಲೊಕಾನ್ ಹ್ಯಾ ಕಾರ್ಯಕ್ರಮಾಂತ್ ಪಾಲ್ ಘೆತ್‌ಲ್ಲೊ. ಅಸೋಸಿಯೇಶನಾನ್ ಮಾಂಡುನ್ ಹಾಡ್‌ಲ್ಲ್ಯಾ ಫೆಸ್ತಾಚ್ಯಾ ಜೆವ್ಣಾಸವೆಂ ಕಾರ್ಯಕ್ರಮ್ ಸಮಾಪ್ತ್ ಜಾಲೆಂ.
