ಕೊಂಕಣಿ ಮಾನ್ಯತಾ ದಿವಸ್ ಆಚರಣ್: 1992 ಆಗೋಸ್ತಾಚ್ಯಾ 20 ತಾರಿಕೆರ್ ಭಾರತಾಚ್ಯಾ ಸಂವಿಧಾನಾಚ್ಯಾ 8 ವ್ಯಾ ವೊಳಿರ್ ಕೊಂಕಣಿ ಭಾಷೆಕ್ ಮಾನ್ಯತಾ ಮೆಳ್‌ಲ್ಲ್ಯಾ ಸಂದರ್ಭಾರ್ ಉಗ್ಡಾಸ್ ಕಾಡುನ್, "ಕೊಂಕಣಿ ಮಾನ್ಯತಾ ದಿವಸ್" ಆಚರಣ್ ಕರುಂಕ್ ಅಸೋಸಿಯೇಶನಾನ್ ಹ್ಯಾ ವರ್ಸಾ ಏಕ್ ವಿಭಿನ್ನ್ ಕಾರ್ಯಕ್ರಮ್ ಮಾಂಡುನ್ ಹಾಡ್ಲೆಂ. ಮಂಗ್ಳುರ್ಚ್ಯಾ ಪ್ರಖ್ಯಾತ್ ಸಂಗೀತ್‌ಗಾರ್ ಮೆಲ್ವಿನ್ ಪೆರಿಸ್ ಹಾಂಚೆಂ "ಸಂಗೀತ್ ಘರ್ ಪ್ರೊಡಕ್ಷನ್ಸ್" ಬ್ಯಾನರಾ ಖಾಲ್ ನಿರ್ಮಿತ್ ಜಾವ್ನ್ ಶಂಬರ್ ದಿಸಾಂಚ್ಯಾಕೀ ಚಡಿತ್ ಪ್ರದರ್ಶನ್ ದೆಕಯಿಲ್ಲೆಂ, ದೇಶ-ವಿದೇಶಾಂನಿ ಹೊಗ್ಳಿಕೆಕ್ ಫಾವೊ ಜಾಲ್ಲೆಂ, ಸಂಗೀತಾಚೆಂ ಕಥಾಹಂದರ್ ಆಸ್ಚೆಂ ಕೊಂಕಣಿ ಪಿಂತುರ್ "ಪಯ್ಣ್" ಫಕತ್ ಮೈಸೂರ್ಚ್ಯಾ ಆನಿ ಆಸ್-ಪಾಸ್ ಆಸ್ಚ್ಯಾ ಕೊಂಕಣಿ ಲೊಕಾ ಪಾಸತ್, ಮೈಸೂರ್ ವಿಜಯನಗರಾಂತ್ ಆಸ್ಚ್ಯಾ ಜಗನ್ನಾಥ ಕಲೆ ಮತ್ತು ಸಂಸ್ಕೃತಿ ಕೇಂದ್ರ ಹಾಂಗಾಸರ್ ಪ್ರದರ್ಶನ್ ಕರುಂಕ್ ದಿನಾಂಕ್ 17-08-2025 ಸಾಂಜೆರ್ 4:30 ವರಾಂಚೆರ್ ಆಯೋಜನ್ ಕೆಲ್ಲೆಂ. ಸುಮಾರ್ 350 ಲೊಕಾಂನಿ ಹೆಂ ಪಿಂತುರ್ ಪಳೆವ್ನ್ ಖುಶಿ ಭೊಗ್ಲಿ.
ಹ್ಯಾ ಸಂದರ್ಭಿಂ ಅಸೋಸಿಯೇಶನಾನ್, ಹ್ಯಾಚ್ ಕೇಂದ್ರಚ್ಯಾ ವೇದಿಚೆರ್ ಪ್ರಖ್ಯಾತ್ ಕೊಂಕಣಿ ಸಂಗೀತ್‌ಗಾರ್ ಆನಿ ಕಲಾಕಾರ್ ತಶೆಂಚ್ ಪಯ್ಣ್ ಚಲನ್ ಚಿತ್ರಾಚೊ ರುವಾರಿ ಜಾವ್ನಾಸ್ಚ್ಯಾ ಶ್ರೀಮಾನ್ ಮೆಲ್ವಿನ್ ಪೆರಿಸ್ ಹಾಂಕಾ ಶಾಲ್, ಝುಲೊ ಆನಿ ಉಗ್ಡಾಸಾಚಾ ಫಲಕಾಸವೆಂ ಸನ್ಮಾನ್ ಕೆಲೆಂ. ತಶೆಂಚ್ ಮಂಗಳೂರು ಗಣೇಶ್ ಬೀಡಿ ವರ್ಕ್ಸ್ ಮೈಸೂರು ಹಾಚೊ ಮ್ಯಾನೇಜಿಂಗ್ ಪಾರ್ಟನರ್ ಆನಿ ಮೈಸೂರ್ಚ್ಯಾ ಸಬಾರ್ ವಿದ್ಯಾಸಂಸ್ಥೆಚೆ ಅಧ್ಯಕ್ಷ್ ಆನಿ ಕಾಮಾಕ್ಷಿ ಆಸ್ಪತ್ರೆಚೆ ಟ್ರಸ್ಟಿ ಜಾವ್ನ್ ಸೇವಾ ದೀವ್ನ್ ಆಸ್ಚ್ಯಾ ಶ್ರೀಮಾನ್ ಜಗನ್ನಾಥ್ ಶೆಣೈ ಹಾಂಕಾಂಯೀ ಶಾಲ್, ಝುಲೊ ಆನಿ ಉಗ್ಡಾಸಾಚಾ ಫಲಕಾಸವೆಂ ಸನ್ಮಾನ್ ಕೆಲೆಂ. ಹೊ ಸನ್ಮಾನ್ ಕಾರ್ಯೆಂ ಅಸೋಸಿಯೇಶನಾಚೊ ಅಧ್ಯಕ್ಷ್ ಜೋನ್ ವಿಲಿಯಂ ಡಿಸೋಜ ಹಾಣೆಂ, ಕವಿ-ಸಾಹಿತಿ ಶ್ರೀಮಾನ್ ವಲ್ಲಿ ವಗ್ಗ ಹಾಂಚಾ ಸಾಂಗಾತಾ ಚಲವ್ನ್ ವೆಲೆಂ.
ಅಸೋಸಿಯೇಶನಾಚೊ ಸಹ-ಕಾರ್ಯದರ್ಶಿ ಶ್ರೀ ಸಿಲ್ವೆಸ್ಟರ್ ಡಿಮೆಲ್ಲೊ ಹಾಣೆಂ ಪಿಂತುರಾಕ್ ಸ್ಪೊನ್ಸರ್ ಕೆಲ್ಲ್ಯಾಂಚೊ ಜಾಹಿರಾತಾಂಚೊ ವೀಡಿಯೊ, ತಶೆಂಚ್ ಸನ್ಮಾನಿತಾಂಚೆ ಪ್ರೆಸೆಂಟೇಶನ್ ವೀಡಿಯೊ ತಯಾರ್ ಕರುನ್ ಡಿಜಿಟಲ್ ಸ್ಕ್ರೀನಾರ್ ಪ್ರದರ್ಶಿತ್ ಕೆಲೆಂ.
ಅಸೋಸಿಯೇಶನಾಚಿ ಉಪಾಧ್ಯಕ್ಷಿಣ್ ಶ್ರೀಮತಿ ಮೀನಾ ಡಯಾಸ್ ಹಾಣೆಂ ಹೆಂ ಪುರ್ತೆಂ ಕಾರ್ಯಕ್ರಮ್ ಚಲವ್ನ್ ವೆಲೆಂ. ಇಂಟರ್‌ವೆಲ್ಲಾರ್ ಅಸೋಸಿಯೇಶನಾನ್ ಸರ್ವಾಂಕ್ ಕಾಫಿ-ಫಳಾರಾಚಿ ವ್ಯವಸ್ಥಾ ಆಸಾ ಕೆಲ್ಲಿ.
