ಕೊಂಕಣಿ ಕ್ರಿಶ್ಚಿಯನ್ ಅಸೋಸಿಯೇಶನ್ (ಆರ್) ಮೈಸೂರು ಹಾಣಿಂ ಫೆಬ್ರವರಿ 17 ವೆರ್ ವಿಜಯನಗರ 2 ವೊ ಹಂತಾಂತ್ ಆಸ್ಚ್ಯಾ ಆಪ್ಲ್ಯಾ ಕೊಂಕಣ ಭವನಾಂತ್ ತಾಲೂಕಾಚ್ಯಾ ಸರ್ಕಾರಿ ಶಾಲೆಚ್ಯಾ ಎಸ್‌ಎಸ್‌ಎಲ್‌ಸಿ ವಿದ್ಯಾರ್ಥಿಂಕ್ ನವೆಂ ಚೇತನ್ ಆನಿ ಪ್ರೇರಣಾ ದಿಂವ್ಚೊ ಏಕ್ ವಿಶೇಸ್ ಕಾರ್ಯಕ್ರಮಾಯೊಜನ್ ಕೆಲ್ಲೊ. ಸಕಾಳಿಂ 10:30 ವ್ಹಾರಾರ್ ಕರ್ಣಾಟಕ ಪಬ್ಲಿಕ್ ಸ್ಕೂಲ್ ಎಮ್ ಜಿ ಕೊಪ್ಪಳಾಚ್ಯಾ ವಿದ್ಯಾರ್ಥಿಂನಿ ಪ್ರಾರ್ಥನ್ ಗಾಯ್ನಾ ಸವೆಂ ಕಾರ್ಯಕ್ರಮ್ ಸುರು ಕೆಲೆಂ. ಸಂಸ್ಥ್ಯಾಚಿ ಸೆಯ್ಕ್ರೆತಾರ್ ಜೋಯ್ಸ್ ಸಿಕ್ವೇರಾ ಹಾಣಿಂ ವೆದಿರ್ ಆಸ್ಚ್ಯಾ ಸಯ್ರ್ಯಾಂಕ್ ಮೋಗಾನ್ ಸ್ವಾಗತ್ ಕೆಲೊ. ಶಾಲಾ ಶಿಕ್ಷಣ್ ಇಲಾಖೆಚೊ ಡಿಡಿಪಿಐ ಉದಯ ಕುಮಾರ್ ಡಿ, ಮೈಸೂರು ರೂರಲ್ ಬಿಇಒ ಪ್ರಕಾಶ್ ಎಮ್, ಹಿಂಕಳಾಚ್ಯಾ ಹೊಲಿ ಫ್ಯಾಮಿಲಿ ಚರ್ಚಾಚೊ ವಿಗಾರ್ ಫಾ| ಸಂತೋಶ್ ಜಾನ್, ಆನಿ ಯೋಗ ಶಿಕ್ಷಕ್ ತಶೆಚ್ ಕೌನ್ಸಿಲರ್ ಡಾ| ಶಂಭುಲಿಂಗ ಬಿ ಪಾವಟೆ ಹಾಣಿಂ ದಿವೊ ಪೆಟವ್ನ್ ಕಾರ್ಯಕ್ರಮ್ ಉಗ್ತಾಯ್ಲೆಂ.
ಡಿಡಿಪಿಐ ಉದಯ ಕುಮಾರ್ ಡಿ ಹಾಣಿಂ ಅಸೋಸಿಯೇಶನಾಚ್ಯಾ ಸಾಮಾಜಿಕ್ ಸೆವೆಚಿ ವಖಾಣ್ಣಿ ಕೆಲಿ. ಎಮ್ ಜಿ ಕೊಪ್ಪಳ್, ಹಿಂಕಳ್, ಹೂತಗಳ್ಳಿ ಆನಿ ಯೆಳವಾಳ ಭಾಗಾಚ್ಯಾ ಸರ್ಕಾರಿ ಶಾಲಾಂಚ್ಯಾ ವಿದ್ಯಾರ್ಥಿಂಕ್ ಪ್ರೇರಣಾ ದಿಲ್ಲಾ ಬದ್ಲಾಕ್ ಅಧ್ಯಕ್ಷ್ ಆನಿ ಕಮಿಟಿ ಸಾಂಧ್ಯಾಂಕ್ ಉಲ್ಲಾಸಿಲೆ. ಪರೀಕ್ಷೆಕ್ ಆಜೂನ್ ಕೇವಳ್ 29 ದೀಸ್ ಉರ್ಲ್ಯಾತ್, ದೆಕುನ್ ವಿದ್ಯಾರ್ಥಿಂನಿ ವೇಳಾಚೊ ವಾಯ್ಡ್ ಉಪಯೋಗ್ ಕರಾನಾಸ್ತಾನಾ ಟೈಮ್ ಟೇಬಲ್ ಕರ್ನ್ ಅಭ್ಯಾಸ್ ಕರ್ಚೊ ಮ್ಹಣ್ ಸಾಂಗ್ಲೆಂ. ಜಿವಿತಾಂತ್ ಜಯ್ತ್ ಮೆಳ್ಚೆಖಾತಿರ್ ಬಳ್ವಂತ್ ಉಬೆ ರಾವ್ನ್ ಆಪ್ಲಿ ಜವಾಬ್ದಾರಿ ಆಪಣಾಂಚ್ಯಾ ಭುಜಾಂಚೆರ್ ಘೆಂವ್ಚಿ ಗರಜ್ ಆಸಾ ಮ್ಹಣ್ ತಾಣಿಂ ಉಪದೇಶ್ ದಿಲೊ. ಅಸೋಸಿಯೇಶನಾನ್ ಸಯ್ರ್ಯಾಂಕ್ ಮಾನ್ ಕೆಲೊ.
ಬಿಇಒ ಪ್ರಕಾಶ್ ಎಮ್ ಹಾಣಿಂ ಸರ್ಕಾರಾನ್ ವಿದ್ಯಾರ್ಥಿಂಕ್ ದಿಲ್ಲೆಯೊ ವಿವಿಧ್ ಸೌಲಭ್ಯೊ ಆನಿ ಸೌಕರ್ಯಾಂ ವಿಶಿಂ ಮಾಹಿತಿ ದಿಲಿ. ಬರೆಂ ಅಭ್ಯಾಸ್ ಕರ್ನ್ ಬರೆ ಮಾರ್ಕ್ಸ್ ಘೆವ್ನ್ ಪಾಸಿಂಗ್ ಜಾಂವ್ಕ್ ಪ್ರೇರಣಾ ದಿಲಿ. ಸಾರ್ಕ್ಯಾ ಆಲೋಚನೆನ್ ಆನಿ ಸಾರ್ಕ್ಯಾ ಮನೋಭಾವಾನ್ ಆಪ್ಲಿಂ ಸಪ್ನಾಂ ನಿಜಾಯ್ಕಿ ಕರುಂಕ್ ಪ್ರೇತ್ನ್ ಕೆಲ್ಯಾರ್ ಕೊಂಟೆಯಿ ಆಡ್ಕಳ್ಯೊ ಜಯ್ತ್ ಕರ್ಯೇತ್ ಮ್ಹಣ್ ತಾಣಿಂ ಸಾಂಗ್ಲೆಂ, ಆನಿ ಯೆಂಚ್ಯಾ ಪರೀಕ್ಷೆಕ್ ಸಗ್ಳ್ಯಾಂಕ್ ಶುಭಾಶಯ್ ಚಿಂತಿಲೆ.
ಯಾದವಗಿರಿಚ್ಯಾ ರಾಮಕೃಷ್ಣ ವಿದ್ಯಾಶಾಲಾಚೊ ಕೋರೆಸ್ಪಾಂಡೆಂಟ್ ಶ್ರೀ ಯುಕ್ತೇಶಾನಂದ ಸ್ವಾಮೀಜಿ ಹಾಣಿಂ ಶಿಕ್ಷಣ್ ಕ್ಷೇತ್ರಾಂತ್ ಅಸೋಸಿಯೇಶನ್ ಕರ್ಚ್ಯಾ ನಿಸ್ಸ್ವಾರ್ಥಿ ಸೆವೆಚಿ ಪ್ರಶಂಸಾ ಕೆಲಿ. ವಿದ್ಯಾರ್ಥಿಂನಿ ಸದಾಂಯ್ ಸಂತೋಸಾನ್, ಧೈರ್ಯಾನ್ ಆನಿ ಹುರುಪಾನ್ ಆಸ್ಚೊ ಗರಜ್, ಸವಾಲಾಂಕ್ ಪಳೆವ್ನ್ ಪಳೊನ್ ವಚಾನಾಸ್ತಾನಾ ಪರಿಣಾಮಾಂಚಿ ಪೂರ್ಣ್ ಜವಾಬ್ದಾರಿ ಘೆಂವ್ಚಿ ಮ್ಹಣ್ ತಾಣಿಂ ಪ್ರೇರಣಾ ದಿಲಿ. ತಾಣಿಂ ತೆನ್ಸಿಂಗ್ ಆನಿ ಮೌಂಟ್ ಎವರೆಸ್ಟ್ ತಶೆಚ್ ಹೆರ್ ಮಹಾನ್ ವ್ಯಕ್ತಿಂಚಿ ಪ್ರೇರಣಾದಾಯಿ ಕಾಣಿ ಸಾಂಗ್ಲಿ. ಉಪಾಂತ್ ಡಾ| ಶಂಭುಲಿಂಗ ಬಿ ಪಾವಟೆ ಹಾಣಿಂ ಪರೀಕ್ಷೆಚ್ಯಾ ವೇಳಾರ್ ಬರೆಂ ಕಾಳ್ಜಿ ಘೆಂವ್ಚಿ, ಮಾನಸಿಕ್ ಶಾಂತಿ ದವರ್ಚಿ ಆನಿ ಭಲಾಯ್ಕಿ ಸಾಂಬಾಳ್ಚಿ ವಿಶಿಂ ಉಪಯುಕ್ತ್ ಪ್ರಾಯೋಗಿಕ್ ಟಿಪ್ಸ್ ದಿಲೆ.
ಅಸೋಸಿಯೇಶನಾಚೊ ಉಪಾಧ್ಯಕ್ಷ್ ಸ್ಟ್ಯಾನಿ ಲೋಬೊ ಹಾಣಿಂ ಆಭಾರ್ ಮಾಂಡಿಲೊ, ಆನಿ ಹೆರ್ ಉಪಾಧ್ಯಕ್ಷ್ ಮೀನಾ ಡಾಯಸ್ ಹಾಣಿಂ ಕಾರ್ಯಕ್ರಮ್ ಸುಂದರ್ ರಿತಿನ್ ಚಲವ್ನ್ ವ್ಹೇಲೆಂ. ಅಸೋಸಿಯೇಶನಾನ್ 130 ವಿದ್ಯಾರ್ಥಿಂಕ್ ಜೆವಣ್, ಖಾಣ್-ಪಿಯೊಣ್ ಆನಿ ಪರೀಕ್ಷೆಚೆ ರೈಟಿಂಗ್ ಪ್ಯಾಡ್ ತಶೆಚ್ ಪೆನ್ ಇನಾಮ್ ಜಾವ್ನ್ ದಿಲಿಂ. ಅಸೋಸಿಯೇಶನಾಚೆ ಕಮಿಟಿ ಸಾಂಧೆ, ಶಿಕ್ಷಣ್ ಕೊಆರ್ಡಿನೇಟರ್ಸ್, ಬ್ಲಾಕ್ ರಿಸೋರ್ಸ್ ಕೌನ್ಸಿಲರ್ಸ್, ಕ್ಲಸ್ಟರ್ ಹೆಡ್ಸ್ ಆನಿ 8 ಶಾಲಾಂಚೆ ಶಿಕೊವ್ಪಿ ಹಾಜರ್ ಆಸ್ಲೆ. ರಾಷ್ಟ್ರಗೀತ್ ಗಾವ್ನ್ ಕಾರ್ಯಕ್ರಮ್ ಆಖೇರ್ ಕೆಲೆಂ.
